CEBU, Philippines — Nanganti si San Miguel Beermen import Renaldo Balkman nga buhaton niya ang tanan aron makabawos ang iyang koponan ngadto sa Barangay Ginebra Kings sa Game 5 PBA Commissioner's Cup karong gabii didto sa Smart Araneta Coliseum.
Doble ang kapungot ni Balkman tungod kay gawas nga wala niya makuha ang 'Best Import' award, gilubong pa gyud sila sa Kings sa iskor nga 100-130 sa Game 4 niadtong Biyernes.
"I guarantee that we'll come out hard on Sunday, trust me. Y'all can mark my words on that, guarantee," matud pa ni Balkman sa PBA.com.
Ang kanhi NBA forward pirme sab nga nakiglalis sa mga reperi tungod sa nakita niya nga dili makiangayong tawag nga nakaapekto sa iyang duwa sa Game 4. Sa maong duwa, si Balkman miiskor lang og 14 puntos.
Wala hinuon gikuwestiyon ni Balkman ang pagdaog ni Ginebra import Justin Brownlee sa 'Best Import' award, apan ipakita karong gabii nga mas maayo siya nga import.
Ang San Miguel laraw nga moposte og 3-2 nga bentaha sa Game 5 nga mopaduol kanila sa PBA Commissioner's Cup title.
Sa iyang bahin, si Ginebra coach Tim Cone nagtuo nga moabot gyud sa Game 7 ang serye tungod kay ang iyang team ug ang San Miguel nagpulipuli og daog.
Timaan kini nga ang managsuong koponan seryoso gyud nga modaog sa korona.
Sama ni Balkman, si Cone gusto usab nga makuha nila ang daog karong gabii aron mohayag ilang tsansa sa PBA title.