Cebu City Sharks gisirohan sa first quarter batok manila stars sa MPBL Datu Cup

CEBU, Philippines – Nagkagidlay nang daan, apan nasamotan pa ang kalbaryo sa Cebu City Sharks.

Sa duwa nga lisud mahikalimtan sa mga Sugboanon, ang Sharks scoreless sa unang kuwarter sa makauulaw nilang 76-107 nga kapildihan batok sa Manila Stars sa 2018 Maharlika Pilipinas Basketball League (MPBL) Datu Cup niadtong Martes sa gabii didto sa Cuneta Astrodome sa Pasay City.

Gumikan niini, ang Sharks padayong nangiwit sa standing kay wala pa'y daog sa upat ka duwa.

Nasipyat ang Sharks sa tanan nilang 15 ka itsa sa makapadismaya nilang duwa sa unang kuwarter.

Sa kasaysayan sa basketbol sa Pilipinas, wala  pa'y  team nga wala makapuntos sa tibuok bahin sa unang kuwarter.  Usa kini ka mapait   nga   rekord  nga maghamok sa Sharks sa dugaydugay nga panahon.

Samtang  naglisud ang Sharks, ang Stars mirehistro sa labing taas nga scoring run nga milanat og 29-0 sa kasaysayan sa MPBL human gisirohan ang Sharks sa unang kuwarter, 27-0.

Diha na makaiskor ang Cebu pinaagi sa duha ka free throws ni Patrick Cabahug sa oras nga 9:05 sa ikaduhang kuwarter, apan wala kini makahatag bisan og gamay'ng kainit sa bugnaw kaayong dinuwaan sa Sharks.

Si Cabahug maoy nangu sa Sharks uban ang 28 puntos, apan nasipyat sa una niyang upat ka itsa apil na ang tulo ka 3-pointers.

Gawas nga mipasud og lima lamang sa siyam nila ka free throws, ang Sharks mipasa lamang og siyam ka assists kumpara sa league-best 37 assists sa Stars.

Taas pa hinuon ang season ug ang Sharks  duna pa'y panahon pagtukob sa idlas kaayong daog sa ilang pakigsangka batok sa Batangas City Athletics karong Agosto 2 didto sa Batangas City Coliseum.