CEBU, Philippines – Nakigdumog og maayo ang pambato sa Yaw-Yan ArDigma Cebu nga si Roel 'Akiyama' Rosauro batok sa beterano nga si Sunoto 'Terminator' Peringkat, apan ang iyang mga paningkamot dili igo aron makuha ang daog sa One Championship sa miaging gabii didto sa Singapore.
Si Rosauro mipakita sa iyang katakus sa kickboxing ug milusad og atake ngadto ni Sunoto, apan ang Indonesian migamit sa iyang abilidad sa grappling aron pugngan ang mga hait nga patid sa Sugboanong fighter.
Naluya si Sunoto sa pagsuway og pugong ni Rosauro, kinsa wala kapasud og tarong sa iyang mga patid ug sukmag.
Human sa tulo ka hugna nga sangka, si Sunoto midaog pinaagi sa puntos. Ang kapildihan ni Rosauro nabawi ra usab sa kanhi world champion nga si Eduard 'Landslide' Folayang nga mimakmak sa kanhi wa'y pildeng Ruso nga si Kharun Atlangeriev.