CEBU, Philippines – Andam na ang tanan alang sa pagbanhaw sa Philippine National Games (PNG) diin kapin sa 3,000 ka mga atleta gikan sa nagkadaiyang dapit sa nasud ang magtigi ning usa ka semanang torneyo nga katapusang gipahigayon dinhi sa Sugbo 21 ka tuig na ang milabay.
Lagmit mosaka pa ang numero ngadto sa 4,000 sa mosunod nga duha ka adlaw, matud pa ni PNG secretariat head Annie Ruiz.
Bisan tuod og mas ubos kini kay sa inisyal nilang gipaabot, si Philippine Sports Commissioner ug PNG overall chairman Ramon Fernandez miingon nga ang mga partisipante pulos mga tadhan sa tagsa-tagsa nila ka mga events.
Sama sa miaging edisyon, ang mga sakop sa national team moduwa ubos sa tagsa-tagsa nila ka mga LGUs (local government units).
Sa pagbuhi nila og balik sa PNG, si Fernandez nagkanayon nga laraw nilang himuon kini nga “Philippine Olympics” nga mao unya ang basihan sa paghagpat nila og mga miyembro sa national team.
Ang PSC mohatag og insentibo pinaagi sa sports program ug equipment ngadto sa top 5 LGUs nga manghawod sa kompetisyon karong Mayo 19-25.
Ang makampiyon modawat og P5 million, samtang ang ikaduha hangtod sa ikalimang dapit makaangkon og P4M, P3M, P2M ug P1M.
Sa kinatibuk-an, 22 ka events ang banatan.
Sagad niini duwaon sa dakbayan sa Sugbo, apil na ang athletics, badminton, boxing, chess, dancesport, judo, karatedo, swimming, table tennis, taekwondo, men’s tennis ug volleyball.
Ang Naga maoy mopadagan sa sepak takraw, women's tennis ug weightlifting, ang triathlon sa Tabuelan, archery, duathlon ug cycling sa Danao, softball sa Lapu-Lapu City ug arnis sa Mandaue.