CEBU, Philippines – Nagbangutan karon si San Antonio Spurs coach Gregg Popovich sa pagpanaw sa pinangga niyang kapikas nga si Erin niadtong Huwebes sa edad nga 67 gumikan sa taud-taud nang sakit nga gihambin niini.
Sila si Erin ug Gregg Popovich minyo sud sa 40 ka tuig ug nabuligan og duha ka anak ug duha sab ka mga apo.
Daghan ang naguol ug mipadayag sa ilang pahasubo ngadto ni Popovich, apil na niini si NBA superstar LeBron James sa Cleveland Cavaliers.
Gihulagway ni King James nga usa ka trahedya ang pagtaliwan ngadto sa laing kalibotan sa asawa sa coach nga iyang giidolo.
“Obviously I’m a huge Pop fan. I love Pop. That’s such a tragedy,” matud pa ni James nga emosyonal kaayo.
Susama sab ang sentimento sa mga giisip ni Popovich nga iyang mga anak sa Spurs sama nilang Manu Ginobili ug Tony Parker.
“We are all hurting,” sumala pa ni Ginobili.
Si Popovich usa sa labing respetado ug tinamod nga mga coaches sa kasaysayan sa NBA. Nakadaog siya og lima ka kampiyonato uban sa Spurs diin siya maoy coach sukad pa niadtong 1996 nga naghimo kaniyang labing dugay nga coach sa usa ka team sa kasaysayan sa liga.