CEBU, Philippines – Memoryado na ni kanhi Irish world champion Carl Frampton ang tanang lihok og estilo ni Nonito ‘The Filipino Flash’ Donaire Jr. nga naghatag kaniya og kompiyansa nga modaog sa ilang sangka karong Domingo didto sa Belfast, Ireland.
Sila si Frampton ug Donaire mag-ilog sa bakanteng WBO interim featherweight title.
Si Frampton nagkanayon nga usa ka lisud nga kontra si Donaire, apan iya na kining gipangandaman og maayo.
Matud ni Frampton nga kanunay niya nga gitan-aw ang mga sangka sa una ni Donaire tungod kay idolo niya kini ug kini hinungdan nganong dili na bag-o kaniya ang ipakita nga lihok sa Pinoy.
Si Frampton adunay rekord nga 24-1, 14KOs, samtang si Donaire nga mas una kaniya sa boksing nagbitbit og 38-4, 24KOs.