CEBU, Philippines - Ang Sugboanong boksidor nga si Junriel Jimenez mokatkat og balik sa ring human sa siyam ka bulan nga pahuway sa dihang makigbinukbukay siya ni Elias Joaquino alang sa Philippine Boxing Federation (PVF) super flyweight title sa main event sa “Sumbagay sa Medellin-Halad Ni Sr. Sto. Niño” boxing promotion karong gabii didto sa Medellin Sports Complex.
Ang maong international card nga gipasiugdahan sa lokal nga kagamhanan sa Medellin ug sa Big
Yellow Promotions ug Cebuano businessman-sportsman Lorenzo ‘Chao’ Sy magsilbe sab nga debut ni Jimenez sa 115-pound division.
Hait gihapon kaayo ang abilidad sa 22-anyos nga si Jimenez bisan og wala ni makaaway pa sukad
gipalukapa si Margarito Moya niadtong Hulyo 8 sa miaging tuig diha sa IEC Convention Center sa Barangay Mabolo, dakbayan sa Sugbo.
Si Jimenez midaog sa katapusan niyang away pinaagi sa knockout, apan naaberiya ang iyang
karera gumikan sa problema sa timbang hinungdan nga wala na siya makasalida pa sud sa dul-an sa usa ka tuig.
Nagbitbit og 8-1 record uban ang 5KOs, si Jimenez inilog, apan dili siya angayan nga mokompiyansa gumikan kay dili sab kabintahaan nga kontra si Joaquino nga dunay 12-2-1 record uban ang 6KOs.
Si Joaquino mas halapad sab og kasinatian, mangtas nga counter-puncher ug labaw sa tanan gutom og titulo.