Andam na ang tanan alang sa Hunat Sugbu 8
CEBU, Philippines — Kapin sa 2,000 ka runners ang gilauman nga modagan sa 8th Hunat Sugbu: Dagan Para Ni Maning nga gitakda sa Hunyo 24 diha sa Terraces sa Ayala Center Cebu.
Gipasiugdahan sa Cebu Parklane International Hotel, ang tinuig nga charity run gipahinungod ni anhing Manuel Go Ting, ang founding president sa maong hotel.
Adunay 3K, 6K, 12K ug 21K categories ang maong lumba.
“Hopefully we will reach our target of 2,200 runners. This race is made not just for fun and fitness but mainly to support our medical mission in partnership with Jesu Christi as our beneficiary,” matud pa ni Hunat Sugbu Chairman Nicanor Nacorda.
Ang kabahin usab sa matigom nga salapi ihatag ngadto ni Alex Silverio, usa ka paratriathlete nga damgong mosalmot sa Paralympics.
Moabot ngadto sa P72,000 nga ganting salapi ang gitagana alang sa top finishers sa tanang kategoriya.
Ang registration fee nagkantidad og P400 sa 3K, P500 sa 6K, P700 sa 12K ug P800 sa 21K. Niadtong gustong moapil, mahimong magparehistro didto sa Parklane Hotel lobby, SM City Cebu ug Ayala Center Cebu.
- Latest
