Automatic quarterfinals berth tuyo sa NLEX

CEBU, Philippines - Mangambisyon ang NLEX Road Warriors pagsakmit sa automatic quarterfinals berth sa dihang ilang sangkaon ang Blackwater Elite sa PBA Governors’ Cup karong adlawa didto sa Smart Araneta Coliseum.

Ang NLEX aduna karo’y 5-1 nga baraha ug ang daog nila karon motukmod  kanila  sa playoffs.

Sa dili pa ang duwa sa NLEX ug Blackwater sa alas-7 sa gabii, magsangka una ang Phoenix Fuel

Masters ug Meralco Bolts sa alas-4:15 sa hapon.

Ang NLEX pirmeng dili makasulod sa playoffs sa tulo ka conference, apan human sa gihimo nilang pagpalig-on sa ilang line-up, ang koponan ni coach Yeng Guiao usa na karon sa mga  gikahadlokang team sa Governors’  Cup.

Gipamatud-an kini sa NLEX human sa ilang 100-94 nga kadaogan batok sa igsuon nilang koponan ug kanhi wa’y pilde nga Meralco Bolts sa miaging semana.

Sa labing unang higayon, masaksihan ang pagduwa ni veteran Cyrus Baguio nga mohimo og ‘debut’ sa  bag-o niyang team nga NLEX. Si Baguio gikuha sa NLEX gikan sa Phoenix  pinaagi sa trade.  Iya ikauban ang laing scorers nga silang Alex Mallari, JR Quiñahan ug Kevin Alas. (BANAT NEWS)

Show comments