CEBU, Philippines - Human sa dul-an usa ka tuig, hingpit na nga nagbuwag og dalan ang veteran shooter nga si Jeffrey Chan ug Rain or Shine Elasto Painters.
Kini dihang gipahibalo sa Painters kagahapon nga ilang gi-trade si Chan sa Phoenix Fuel Masters bugti ni forward Mark Borboran ug usa ka second round pick sa sunod PBA draft.
Si Chan nasigpatan nga miapil sa training sa Phoenix Fuel Masters kagahapon pangandam sa sunod nga duwa sa koponan karong semanaha.
Ang Painters star point guard ug suod nga higala ni Chan mihatag usab og mensahe gamit ang social media diin iyang gidayeg ang shooter isip usa ka maayong teammate.
“You will always be the sniper of RoS. I wish you nothing but the best with your new team,” matud pa ni Cruz sa iyang social media account.
Si Chan niduwa sa Rain or Shine sukad pa niadtong tuig 2009 sa wala pa palita sa Painters ang Red Bull Barako franchise.
Ang produkto sa Far Eastern University (FEU) nahimong usa sa mga haligi sa koponan diin gitabangan niya ang Painters sa pagdaog og duha ka PBA title, ang labing uwahi sa miaging tuig sa Commissioner’s Cup.
Gawas sa PBA, mihimo usab og pangan si Chan isip usa sa mga banggiitang shooter sa kasaysayan sa Gilas Pilipinas diin miduwa kini sa 2014 FIBA World Cup didto sa Spain. (BANAT NEWS)