Lee gidepensaan sa iyang teammates

CEBU, Philippines - Gipanalipdan sa  iyang teammates sa Star Hotshots si Paul Lee  human gisaway kay wala moduwa sa Gilas Pilipinas 5.0.

Si Lee usa sa mga  sakop sa Gilas pool, apan gitangtang kini kay mirason kini nga aduna siya’y gihambin nga injury sa tuhod. Dihang gisugdan na ang PBA Commissioner’s Cup niadtong miaging semana, si Lee miingon nga moduwa siya uban sa Star.

Tungod niini daghan ang nasuko ilabi na ang mga fans sa  Gilas ug gipasanginlan nila si Lee nga mipalabi sa iyang PBA mother team kaysa sa pagserbisyo sa  nasudnong koponan.

Ang teammate ni Lee nga si Marc Pingris nagkanayon nga dili angay nga sawayon ang desisyon ni Lee ug dili tinuod nga wala niya hatagi og bili ang iyang responsibilidad sa national team. Si Pingris nahimong teammate ni Lee sa national team nga miduwa sa 2014 FIBA World Cup didto sa Spain.

Miingon si Pingris nga dili sayon ang pagduwa sa Gilas tungod kay mas bug-at ang training niini itandi sa PBA ug makiangayon ang gibuhat ni Lee.

Si Allein Maliksi nga mihulip ni Lee sa national team nagkanayon nga dili kayahon sa iyang teammate ang ensayo sa Gilas human niya kini masinati sa miaging Lunes. (BANAT NEWS)