CEBU, Philippines - Ang Cebu Provincial Sports Commission (CPSC) molusad og usa ka komprehensibong grassroots sports program ngadto sa kapin sa 1,600 ka mga estudyante sa Sisters of Mary School-Boystown didto sa Minglanilla.
Kini agi’g suporta sa proyekto nga gipasiugdahan sa tinamod nga basketball coach ug league
organizer nga si Van Halen Parmis.
Tulo ka semana ang milabay, si Parmis mipahigayon og multi-sport community outreach sa maong tunghaan alang sa mga bata nga hinikawan sa maayong palad, apan dunay kabangkaagan.
Nakita sa Cebu sports commission ang kanindot sa binhi nga gipugas ni Parmis sa Boystown mao nang mibubo kini sa ilang suporta sa tinguha nga molungtad ug masustinir ang maong programa.
Sa miaging adlaw, si Brando Velasquez sa CPSC nakighimamat sa nagkadaiyang mga coaches diin ilang gituki unsaon pagpadagan sa ilang proyekto nga sugdan karong Marso 4 ug molanat og unom ka bulan. Naglangkob kini og dili momenos sa pito ka sports.
Segun sa pasiuna nilang nasabotan, ang mga coaches mag-clinic matag weekend sa Boystown.
Sila si Parmis ug Jonathan Belano maoy modala sa basketball, si Antonio Abellana sa badminton, si Ronald Remolino sa swimming, si Eleazar Toledo sa football, si Francis Belizo sa athletics, si Charlie Roscios sa volleyball ug si Lezlie Agbon sa table tennis.
Gawas sa honorarium, si Velasquez nagkanayon nga ang CPSC mohatag sab sa mga coaches sa gikinahanglan nilang mga ekipo sa training. (BANAT NEWS)