CEBU, Philippines - Seguradong malawman pa ang kaalam sa mga Sugbuanong basketball coach gumikan sa ipahigayong 'Coaches Clinic' nga pasiugdahan sa Jr. NBA Philippines inabagan sa Alaska Milk karong adlawa diha sa University of San Carlos-Main gym.
Ang maong aktibidad pagasugdan sa alas-5 sa hapon ug mahuman alas 8:30 sa gabii.
Si coach Craig Brown, ang NBA Asia Director of Basketball Operations, mangunay og anhi aron ipaambit sa mga Sugbuanong coach ang pipila ka mga mahinungdanong butang kabahin sa saktong pamaagi pagtudlo ug ingon pagduwa og basektbol ilabi na ngadto sa mga kabatan-onan ug sumusulbong nga mga talento.
Ang maong kalihukan usa sab ka oportunidad sa mga Sugbuanon aron mapalapdan ang ilang nahibaw-an sa natad sa coaching kay usa man ka tinamod nga personalidad sa NBA ang mopadagan niini ug seguradong undanon ang ilang mga makat-onan.
Alang sa dugang impormasyon, kadtong mga interesado mahimong motawag ni Tessa Jazmines (0917-5261369). (BANAT NEWS)