CEBU, Philippines - Sila si Jennylyn Nobleza ug Rafael Pescos miguwa nga maoy labing daogon sa all-Filipino full distance category sa 10th Cebu Marathon kagahapong adlawa diha sa Cebu Business Park.
Nahimong mas espesyal ang kadaogan ni Nobleza gumikan kay iya na gyud nga gipilde ang Kenyan niyang karibal nga si Susan Chepwony human sa upat niya ka pagsuway.
“Di ako nag-expect na ako ang pinakaunang matapos sa lahat ng girls especially nandyan ulit si Susan (Chempwony). Lagi na lang kaming nag-head to head nyan sa race na to at kahit dun din sa Cagayan. Ngayon, nakabawi rin ako,” matud pa sa 29-anyos nga si Nobleza.
Isip labing paspas sa tanang babayeng entrante, nadepensaan sab ni Nobleza ang iyang all-Filipino women's title human gitapos ang makutas nga lumba agi sa kadalanan sa dakbayan sa Sugbu, Mandaue ug Lapu-Lapu sud sa tulo ka oras, 18 minutos ug 46 segundos.
Bisan og nagsunod ni Nobleza, si Chepwony nga mipatik og oras nga 3:33:39 mao gihapon ang midominar sa foreign female category diin silang Lodie Eneco sa France (4:33:41) ug Yi Liam Pang sa Singapore (4:42:24) maoy mikapyot sa nagsunod nga duha ka puwesto.
Ang kababayan ni Chepwony nga si Eric Chepsiror yanong nakadepensa sa iyang korona sa male foreign class sud sa oras nga 2:34:26.
Sa all-Filipino male battle, si Pescos nakahimo og dakong surprisa human iyang gipakugang si Milo Marathon champion Jeson Agravante aron pagsakmit sa labing una niyang CM title. Si Pescos mirehistro og oras nga 2:38:14 nga igo kaayong nakapilde ni Agravante nga mitali lamang og 2:39:40.
Lain pang mga mananaog mao sila si Prince Joey Lee (1:15:42) ug Ruffa Sorongon (1:35:56) sa 21K, Ariel Saballa (35:11) ug Cherry Andrin (48:00) sa 10K, ug Earl Pionela (17:19) ug Mary Joy Loberanis (19:54) sa 5K. (BANAT NEWS)