CEBU, Philippines - Yano kaayo nga milansang sa iyang duha ka krusyal nga free throws si Dwyane Wade sa daginutong segundos nga nahabilin aron pag-aswat sa Chicago Bulls ngadto sa 98-85 nga kadaugan batok sa Heat sa emosyonal kaayo niyang pagbalik sa Miami sa labing unang higayon.
Sa wala pa mitapon sa Bulls nga mitanyag kaniya og $47 million sud sa duha ka tuig, si Wade miduwa sa tibuok niyang 13 ka season sa NBA uban sa Heat diin iya kining gitabangan paglangkat og tulo ka kampiyonato.
“What a game. I am glad it is over, but more important I am glad we got a win,” matud pa ni Wade nga mitimbaya pa sa mga fans nga nagdasok didto sa American Airlines Arena human sa ilang kadaugan batok sa kanhi niya team.
Mitapos lamang siya og 13 puntos, pito ka rebounds ug upat ka assists sud sa 32 minutos nga pagduwa, apan ang iyang free throws sa nahabilin nga 13 segundos sa duwa maoy nagselyado sa ilang kalampusan.
Si Jimmy Butler mibahog og 20 puntos, samtang sila si Robin Lopez ug Rajon Rondo mitali og 16 puntos matag usa alang sa Bulls nga nagtangag na karon og 5-4 nga baraha.
Didto sa Denver, si Stephen Curry miburak og pito ka tres sa iyang 33 puntos sa dihang gipakaging sa Golden State Warriors ang Nuggets, 125-101. Midugang sab siya og pito ka assists ug lima ka rebounds, samtang si Klay Thompson miamot og 29 puntos.
Ang pagpangigo nilang Curry ug Thompson igo kaayong nakatabon sa bugnaw nga salida ni Kevin Durant, kansang ratsada sud sa 72 ka duwa diin siya nakaiskor og dili momenos 20 puntos nabugto. Si Durant mihipos lamang og 18 puntos.
Samtang didto sa Bradley Center sa Milwaukee, si Anthony Davis mipabuto og 30 puntos uban ang walo ka rebounds alang sa New Orleans Pelicans nga midaog na gyud karon season human gibuntog ang Milwaukee Bucks, 112-106.
Si Davis nga wa’y sipyat sa walo niini ka free throws, mipasud og 12 sa 25 niya ka tirada alang sa Pelicans nga mipakgang sa walo ka sunod-sunod nilang pilde. (BANAT NEWS)