CEBU, Philippines – Mipabuhagay og 25 puntos si Russel Westbrook apil na niini ang iyang jumper sa nahabilin nga 18.7 segundos nga maoy nag-aswat sa Oklahoma City Thunder ngadto sa 85-83 nga kadaugan batok sa Los Angeles Clippers sa nagpadayong aksiyon sa 2016-2017 NBA season kagahapon didto sa Los Angeles.
Gawas pa niini, si Westbrook milangkat og unom ka rebounds ug lima ka assists sa Thunder nga karon aduna na’y 4-0 nga baraha uban sa defending champion Cleveland Cavaliers.
Naminghoy og samot ang Clippers gumikan kay usa lamang ka itsa ang ilang napasud sa nahabiling singko minutos sa duwa.
Si Chris Paul mitapos og 15 puntos uban ang 11 ka rebounds ug siyam ka assists, apan nahug nga wala kini bili gumikan kay nakatilaw ang Clippers sa labing una nilang pilde human makasagunson og tulo ka daog.
Sa laing bahin, si Lou Williams mikulit og 16 sa iyang 18 puntos sa katapusang kuwarter sa dihang gibuntog sa LA Lakers ang inilog nga Atlanta Hawks, 123-116. Nangu sa Lakers mao si D’Angelo Russell sa iyang 23 puntos.
Si Dwight Howard dunay 31 puntos ug 11 ka rebounds, samtang si Tim Hardaway Jr. mihipos og 26 puntos sa pilderong Hawks.
Sa laing mga duwa, si Kemba Walker mipupo og 22 puntos ug si Nicolas Batum mikabkab og 17 sa iyang 20 puntos sa ikatulong kuwarter aron paggiya sa Charlotte Hornets ngadto sa 109-93 nga daog batok sa Philadelphia 76rs.
Si Brook Lopez mipabuto og 34 puntos uban ang 11 ka rebounds sa dihang gipaksit sa New Jersey Nets ang Detroit Pistons, 109-101.
Si James Harden dunay 30 puntos ug 15 ka assists sa 118-99 nga kadaugan sa Houston Rockets batok sa New York Knicks, 118-99.
Wala sab magpabitin si DeMar DeRozan nga mipatuasik og 40 puntos sa dihang gipilde sa Toronto Raptors ang Washington Wizards, 113-103, samtang ang Memphis Grizzlies ug Phoenix Suns parehong midaog sud sa overtime.
Ang Grizzlies miihaw sa New Orleans Pelicans, 89-83, samtang ang Suns mipakaging sa Portland TrailBlazers, 118-115.
Sa uban pang resulta, ang Boston Celtics mipukan sa Chicago Bulls, 107-100 ug ang Utah Jazz mipakurat sa Dallas Mavericks, 97-81. (BANAT NEWS)