Tepora moaway sa unang langyaw nga kaatbang
CEBU, Philippines - Ang Omega Boxing Gym fighter nga si Jhack ‘Golden Boy’ Tepora makig-away sa labing una niyang langyaw’ng kaatbang nga si Galh Susanto sa Indonesia alang sa bakanteng WBO Oriental super bantamweight title sa main event sa “Who’s Next?” 3 boxing card sa Disyembre 2 diha sa Mandaue City Sports and Cultural Complex.
Si Tepora maoy nagkupot sa WBO Asia Pacific youth title, apan gusto pa niya nga mosaka sa ranking sa WBO gikan sa No. 10 hinungdan nga paningkamuton niya nga masakmit ang bakanteng bakus.
Si Tepora laraw usab nga inaton ang iyang perpektong 18-0, 13KOs record sa pakigsangka niya ni Susanto (12-6, 2KOs).
Moaway usab sa maong fight card sila si Kenny ‘Big Heart’ Demecillo, Christian ‘The Bomb’ Araneta ug former Olympian Mark Anthony Barriga.
Si Demecillo manalipod sa iyang WBF Asia Pacific bantamweight title batok ni Jestoni Autida sa Peñalosa Stable, samtang si Araneta makigsangka ni Philip Cuerdo gikan usab sa Peñalosa Stable.
Laing mga Omega boxers nga moaway sa undercard mao sila si Jason Redondo, Jhaleel Payao, Tomjune Mangubat, Jay-Ar Aliasot, Feljune Taneo ug Marjun Piencenaves.
- Latest
