CEBU, Philippines - Wa’y utlanan ang daog sa Pagutlan ug nakuha nila og balik ang liderato human sa ilang kadaugan batok sa Union Galvasteel, 71-61 sa 6th J/J Surplus basketball tournament niadtong Lunes sa Talit’s Garden.
Sa kasamtangan, ang Pagutlan aduna na’y 6-0 nga baraha ug mao na lang ang koponan nga wala pa’y pilde.
Si Jed Goc-ong mikabkab og 16 puntos, samtang sila si Hiram Cantillas ug Marmar Usarraga parehong mikoykoy og 14 puntos ug si Roger Alcuizar miambit og 10 puntos sa Pagutlan.
Sila lang ni Dodong Tiongson ug Lito Dejarme ang naka-double digits sa Union Galvasteel.
Sa sayo pa, ang El Kapitan misakiyo na sab og daog pinaagi sa paglubong sa Narasaki, 84-54.
Si Jerome Lauron mipaksit og 18 puntos alang sa El Kapitan. Mialalay sab niya silang EJ Abraham ug Manny Salibongcogon nga miiskor sab og double digits alang sa El Kapitan nga sayong nakapanimaho og daog human miposte og makabungog nga labaw sa fourth quarter.
Unom lang ka players ang nakaiskor sa Narasaki pinangulohan ni Jessel Gungob sa iyang 17 puntos. Sila si Ivan Mantuhac ug Jojo Ybañez adunay 14 ug 11 puntos matag usa.
Sa laing aksiyon, ang Junrey Marketing nakaipsot sa Villa Rina Subdivision bitbit ang 59-53 nga kadaugan.
Wala man tuo’y nakaiskor og double figures sa Junrey Marketing, apan maayo kaayo nga pagkabahin-bahin ang ilang mga puntos nga nakapadaog kanila. Ang Villa Rina gipangulohan ni Paul Abenaza nga mihakot og 13 puntos, gisundan nilang Kaka Badoc ug Julius Enoc sa ilang 12 ug 11 puntos.
Ang torneyo gipaluyohan sa J/J Surplus nga gipanag-iya ni Henry Agbon, kinsa mao sab ang presidente sa maong ballclub ug ang mga duwa ubos sa superbisyon ni commissioner Fury Trazona sa abag ni Choy Pilapil.
Puntos matag usa
Unang duwa:
EL KAPITAN (84) – Lauron 18, Abraham 15, Salibongcogon 10, Achumbre 8, Jumamoy 6, Salibongcogon 6, Pepito 6, Ybañez 4, Olgasan 3, Mantilla 2, Quimbo 2.
NARASAKI (54) – Gungob 17, Mantuhac 14, Ybañez 11, Narasaki 6, Javier 4, Salve 2.
Ikaduhang duwa:
PAGUTLAN (71) – Goc-ong 16, Cantillas 14, Usarraga 14, Alcuizar 10, Bontol 4, Esconde 3, Pagobo 3, Judilla 2, Azer 2.
UNION Galvasteel (61) – Tiongson 16, Dejarme 13, Boyles 8, Gellacone 8, Ravanna 5, Capin 4, Gestopa 3, Orongan 2, Dagting 2.
Ikatulong duwa:
JUNREY Marketing (59) – Arellano 7, Yrog-Yrog 7, Inanciso 7, Trangia 6, Arevalo 6, Mercader 6, Wagwag Sr. 5, Yrog-Yrog 4, W. Wagwag 3, Cabillon 2, Oyao 1.
VILLA RINA Subdivision (53) – Abenaza 13, Radoc 12, Enoc 11, Arnado 8, Arca 7, Pepito 2. (BANAT NEWS)