Gilas 5.0 tagak na sa FIBA Asia
CEBU, Philippines - Nahanaw daw aso ang damgo sa Gilas Pilipinas 5.0 nga makasulod bisan sa quarterfinals sa FIBA Asia Challenge human sila gilubong sa Jordan, 105-119 kagahapon didto sa Tehran, Iran.
Ang Gilas nga nakahiagum sa ikatulo nilang pilde sa upat ka duwa, wala kaarte batok sa mga Jordanian nga gipangulohan sa ilang naturalized point guard nga si Dar Tucker, kinsa mipabuto og 37 puntos, samtang ang beterano nilang si Muhammad Hussein miamot og 26 puntos.
Pagsugod pa lang sa duwa, wala na mahitsura ang depensa sa Gilas hinungdan nga gilatan dayon sila sa first period, 24-5. Mitubo pa ang labaw ngadto sa 22 puntos sa halftime sa iskor nga 65-43.
Kapila miaksiyon og gukod ang mga Pinoy, apan kanunay sila nga atbangan og puntos sa mas eksperensiyado nga mga Jordanians. Sa katapusang otso minutos sa final period nakabuylo ang Jordan ug milabaw na og 29 puntos sa iskor nga 90-77.
Ang 1-4 nga Gilas aduna pa’y nahabiling duwa sa classification stage.
Nangulo sa scoring sa Gilas mao si Von Pessumal nga mirehistro og 30 puntos, samtang sila si Mike Tolomia ug Mac Belo miiskor og 19 ug 17 puntos matag usa.
Sa laing bahin, si Philippine Sports Commission chairman William ‘Butch’ Ramirez nadismaya sa performance sa Gilas ilabi na sa American coach niining si Tab Baldwin, kinsa wala mikuyog sa koponan kay gipalabi iyang trabaho isip consultant sa Ateneo Blue Eagles.
Mitimon sa Gilas 5.0 mao ang assistant coach ni Baldwin nga si Josh Reyes. (BANAT NEWS)
- Latest
