CEBU, Philippines - Mipadayag na usab si Manny Pacquiao sa iyang interes nga sangkaon og balik si Floyd Mayweather Jr.
Kana kun dunay dili kapugngang awhag sa mga boxing fans.
“I can still fight at 140-147. I’m willing to fight anybody,” matud pa ni Pacquiao ngadto sa Omnisport.
Ang Pinoy ring star gikatakda nga makigharong ni Jessie Vargas karong Nobiyembre 5 diin siya naglaraw nga mokulit og daog nga lagmit makakumbinser sa retiradong si Mayweather nga moaway og balik.
Si Pacquiao napilde ni Mayweather sa labing daku nga away sa kasaysayan sa boksing niadtong Mayo sa miaging tuig. Apan naputos sa pagsaway ang maong away gumikan sa kakulang niini og aksiyon kay nagpunay og dagan-dagan si Mayweather. Gisamotan pa ang kontrobersiya human si Pacquiao miangkon nga miaway siya nga dunay angol ang tuo niyang abaga.
Bisan si Mayweather miinsister nga malipayon na siya sa iyang estado karon, si Pacquiao abli gihapon sa posibilidad nga mag-abot sila og balik ibabaw sa ring nga iyang gihulagway nga usa ka kulbahinam nga sangka kun ugaling mahitabo kini. (BANAT NEWS)