CEBU, Philippines – Midaog ang Cleveland Cavaliers pinaagi sa paglubong sa Los Angeles Clippers, 114-90 nga maoy labing dakung biya sa host team sa nagpadayong duwa sa National Basketball Association kagahapon didto sa Staples Center sa Los Angeles, California.
Si Lebron James miiskor og 27 puntos alang sa Cavs, kinsa mihimo’g season-high nga 18 ka three-pointers.
Silang James ug mga kauban mihimo og 16 ka three-pointers batok sa L.A. Lakers tulo na ka adlaw ang milabay.
Tataw kaayong sayon ra makaiskor ang Cavs didto sa Staples Center kay duna na sila’y 7-2 win-loss record batok sa Clippers sukad niadtong 2006-2007 season.
Sila si J.R. Smith ug Kyrie Irving mitampo’g 17 puntos matag usa alang sa Cavs, samtang ang reserve nga si Channing Frye mihimo’g 15 puntos ug mitabla sa iyang season-high nga lima ka 3-pointers.
Ang Cavs midaog na og tulo ka sagunson nga duwa ug nainat ang ilang rekord ngadto sa 20-6 batok sa mga teams sa West lakip ang 10-4 record sa ilang road games. Sa laing duwa, si Jose Calderon nakapasulod og three-point shot sa nahabiling two-tenths sa final period aron baswaton ang New York Knicks ngadto sa 90-87 nga kadaugan batok sa Los Angeles Lakers didto gihapon sa Staples Center.
Si Carmelo Anthony maoy nangu sa Knicks pinaagi sa iyang 26 puntos, 12 niini didto sa fourth quarter.
Si Kobe Bryant, miposa og 14 puntos alang sa Lakers nga maoy iyang ika-29 ug katapusang head-to-head match-up batok ni Anthony. Ang gikahinaman nga rematch sa mga rookies nga silang Kristaps Porzingis sa Knicks ug ni D’Angelo Russell sa Lakers wala mahinayon tungod kay ang 7-foot-3 nga forward sa Knicks wala makaduwa tungod sa sakit sa tiyan ug mibalik didto sa ilang hotel room.
Sa lain pang mga duwa, ang Atlanta Hawks midagit og daog dihang ilang gilubong ang Indiana Pacers, 104-75, midaog sab ang Utah Jazz batok sa Sacramento Kings, 108-99 ug ang Milwaukee Bucks midaog batok sa Brooklyn Nets, 109-100. (BANAT NEWS)