Final leg sa 1st mayor Paz RadaZa cycling series banatan karon
CEBU, Philippines - Ang final sa pito ka leg sa 1st Mayor Paz Radaza Cycling Championship Series himuon karong adlawa didto sa Hoopsdome sa Barangay Gun-ob, dakbayan sa Lapu-Lapu.
Si Xterra pro Joseph Miller maoy nag-una sa standings ubos sa elite division bitbit ang 115 puntos. Labaw lamang siya og 15 puntos ni Rolly Cabaluna, samtang si Marchel Barcenal maoy nagdagan sa ikatulong puwesto sa nahipos niining 78 puntos.
Posibleng si Cabaluna maoy mosakmit sa overall title kun siya ang modaog sa karera gumikan kay si Miller lagmit dili na moapil gumikan kay ang atensiyon niini atua na man sa iyang pagbalik sa off-road triathlon pinaagi sa Xterra Philippines karong Pebrero 7 didto sa Albay.
Sa iyang bahin, si Raymart Tampus maoy nangu sa liderato sa beginners class sa natali niining 135 puntos. Nagsunod niya mao sila si Donkey Sanchez nga dunay 90 puntos ug Brian Lozano nga dunay 60 puntos. Ang beteranong Oponganon nga seklista nga si Harlin Bardaje maoy nag-una sa golden boys uban ang 115 puntos. Si Ronald Taperla adunay 100 puntos samtang si Bonifacio Sumalinog dunay 92 puntos.
Sa mountainbike open, si Kent Inoc maoy lider dala ang 111 puntos. Nahimutang sa ikaduha si Reden Tampus nga dunay 93 puntos ug gisundan ni Leonard Talimporos nga dunay 59 puntos. (BANAT PALARO)
- Latest
