CEBU, Philippines – Human sa kapin sa usa ka dekadang panglimbasog, ang Cebu International School (CIS) nakabuno na gyud dayong kulit og kasaysayan isip labing unang team gawas sa Luzon nga misakmit og football title sa tinuig nga International Schools Activities Conference didto sa kaulohan.
Nahimong mas tam-is ang kadaugan sa CIS gumikan kay ang ilang gibihag mao man ang five-time defending champion British School Manila (BSM) sa iskor nga 9-8 sa kulbahinam kaayong penalty shootout.
Sa ilang duwa sa kampiyonato, unang nakaiskor ang BSM apan gipakuratan sa striker sa CIS nga si James Lotzof ang ilang karibal human siya naka-goal sa nahabiling 10 segundos sa duwa hinungdan sa overtime.
Sa 10 minutos nga lugway, wala gihapoy nakaiskor hinungdan sa penalty shootout.
Gawas ni Lotzof, ang mga batos ni Oliver Coluina ug Warlllo Sabella nga sila si Kevin de Keijzer, Joaquin Suarez, Min Woo Cho, Oliver Booth, Bradley Wistehuff, Ken Nishikura, Brian Shin ug Daniel Choi nakaigo sa ilang target.
Samtang sila naglabaw, 9-8, ang BSM wala na makatabla pa human nabantayan ni Booth ang tira sa ikasiyam nga kicker sa BSM aron pagselyado sa labing unang titulo sa CIS sa 12 ka tuig nga kasaysayan sa maong torneyo. (BANAT NEWS)