CEBU, Philippines – Ang MotorAce Racing team mihan-ay og pipila ka misyon nga buot nilang kab-uton sud ning tuiga.
Una sa ilang listahan mao si Mary Joy Tabal nga ilang ituboy aron mamahimong labing unang Pinay’ng atleta nga makasalmot sa marathon event sa Summer Olympics nga ipahigayon didto sa Rio de Janiero, Brazil.
Kun mahingpit ang plano, si Tabal magbansay-bansay sud sa duha ka bulan didto sa Japan sa tinguha nga iyang maabot ang Olympic qualifying time nga duha ka oras ug 45 segundos.
Naglaraw si Tabal nga kuhaon ang maong oras sa Boston Marathon karong Abril.
Samtang si Philip Duenas nga dugay na kaayong coach ni Tabal, hugtanon sab karong nangandam alang sa duha ka 70.3 Ironman events sa Subic karong Marso ug dinhi sa Sugbo karong Agosto.
Mao kini ang unang higayon nga mopakita sa iyang abilidad si Duenas ubos sa MotorAce human siya mibiya sa Ford Forza.
Sa laing bahin, ang MotorAce mopadala og upat ka atleta sa Xterra Philippines karong Pebrero 7 didto sa Albay. Kini naglangkob sa managsuong Jonel ug Chipi Borromeo, World Championship campaigner Tenggoy Colmenares ug Tolitz Albina.
Gawas nga moapil sa kompetisyon, si Jonel Borromeo mibutyag nga mopahigayon sab sila og off-road triathlon series sa nagkadaiyang dapit sa Visayas karong tuiga. (BANAT NEWS)