CEBU, Philippines - Nakarekober dayon ang Cleveland Cavaliers pinaagi sa pagkulit og yanong kadaugan batok sa Brooklyn Nets, 91-78 sa duwa sa NBA kagahapon didto sa Barclays Center sa Brooklyn, New York.
Si Kevin Love mirehistro og 17 puntos ug milangkat og 18 ka rebounds alang sa iyang ika-19 nga double-double, apan si LeBron James maoy nangu sa kadaugan pinaagi sa iyang 18 puntos ug lima ka assists.
Ang Cavs aduna na karo’y 29-11 nga baraha ug padayong nangu sa Eastern Conference standings, samtang ang Nets nahagsa ngadto sa 11-32.
Ang sentro nga si Brook Lopez maoy nangu sa Nets sa iyang 16 puntos ug siyam ka rebounds, samtang si Thaddeus Young midugang og 14 puntos sa wala pa siya ma-fouled out.
Sa laing mga duwa, gilat-an sa Warriors ang Chicago Bulls, 125-94 diin si Stephen Curry mibahog og 25 puntos uban sa iyang 11 ka assists atubangan sa mga fans sa Bulls didto sa United Center.
Ang Toronto Raptors mipukan sa Boston Celtics, 115-109 aron inaton ang ilang winning streak ngadto sa unom ka duwa.
Si DeMar Rozan maoy nangu sa Raptors sa iyang 34 puntos, samtang si Jonas Valanciunas midugang og 19 puntos ug 12 ka rebounds.
Ang Philadelphia 76ers nga maoy nakaangkon sa labing ngil-ad nga rekord karon nga season mipakaging sa Orlando Magic, 96-87.
Gilubong sa Washington Wizards ang undermanned ug piangon nga Miami Heat sa iskor nga 106-87.
Wala makaduwa silang Dwyane Wade ug Goran Dragic. Napun-an ang kalbaryo sa Heat dihang napiang silang Hassan Whiteside ug Luol Deng kagahapon.
Midaog sab ang Oklahoma City Thunder batok sa Charlotte Hornets, 109-95, ang New York Knicks midaog batok sa Utah Jazz, 118-111, ang Detroit Pistons mimakmak sa Houston Rockets, 123-114.
Ang Dallas Mavericks mipilde sa Minnesota Timberwolves, 106-94, ang Sacramento Kings milubong sa Los Angeles Lakers, 112-93 ug ang Atlanta Hawks mibihag sa Portland TrailBlazers, 104-98. (BANAT PALARO)