CEBU, Philippines - Ang Denver Nuggets nga maoy ikatulong team nga nakapilde sa haring gangis ug defending champion Golden State Warriors, 112-110 sa kulbahinam nilang duwa sa National Basketball Association kagahapon didto sa Pepsi Center sa Denver, Colorado.
Ang forward sa Denver nga si Danilo Gallinari mitusak og 28 puntos ug mihimo’g krusyal kaayong steal aron pahamtangan ang Warriors sa ilang ikatulong pilde karon nga season.
Ang star guard nga si Stephen Curry maoy nangu sa Warriors nga mipatuasik og 38 puntos. Misuway og sikit ang Warriors human mabiyai og labing menos 10 sa fourth quarter, apan pakyas sila pag-ilog sa daog.
Ang Warriors aduna na karo’y 36-3 nga baraha, apan pabilin pa silang nagtinguha nga matabla o mapalabwan ang rekord sa regular season nga 72-10 nga gihimo sa Chicago Bulls niadtong 1995-1996 season.
Si Gallinari, kinsa mihimo’g 17-for-19 free throws, misipyat og usa ka free throw sa katapusang 3.1 segundos nga mao unta ang naghatag og higayon sa Warriors nga modaog human lang mabiyai og dos puntos, 110-112.
Ang Warriors mihimo sa katapusang ball possession ug human sa ilang inbound, misipyat si Klay Thompson sa iyang tirada gikan sa three-point area atol sa paghuni sa final buzzer.
Ang Warriors nagduwa nga wala ang ilang pambatong forward nga si Draymond Green. (BANAT PALARO)