Mga sugbuanon miarangkada dayon sa 1ST Peugeot Philippine Tennis Open
CEBU, Philippines – Miarangkada dayon ang mga Sugbuanong netters nga gipangulohan ni Israel ‘RJ’ Abarquez pagsugod sa Cebu leg sa labing unang Peugeot Philippine Tennis Open kagahapon didto sa Cebu Country Club.
Si Abarquez nga atua na karon magbasi sa Singapore diin siya nagtrabaho ubos sa Tennis Allegiance Group, nanginahanglan lamang og 30 minutos aron pagpukan sa 40-anyos niyang kaatbang nga si Ron Vincent Gaite sud sa duha ka sets 6-0, 6-2.
Sa iyang pakigsangka batok ni Venz Alforque sa sunod nga hugna, si Abarquez nanghinaut nga mokulit og daog nga magtuboy kaniya ngadto sa gihandum niyang semifinal match batok ni Francis Casey ‘Niño’ Alcantara, ang usa sa labing tang-an nga players karon sa nasud nga wala pa niya makabangga sukad masukad.
Gawas ni Abarquez, pipila pa ka mga Sugbuanon ang milampos sab sa una nilang mga duwa.
Si Clyde Dale Bienes nakasugakod sa malisud nga first set aron pagpukan sa Bol-anon nga si Maxine Paul Ong, 7-5, 6-1, samtang si Janel Pintor mipatigbabaw batok ni Boyet Lutor, 7-5, 6-1.
Si Marc Suson midaog human miretiro ang Bol-anong si Rainer Jaum sa ikaduhang set, si Norman Joseph Enriquez mibuntog ni Dave Brigole, 6-1, 6-2, samtang si John Clyde Largo mimakmak ni Christopher Enriquez, 6-0, 6-4.
Nakigduyog uban kanila sa sunod nga hugna mao sila si Jaime Catteo, Royen Cabunilas, Mike Evan Bienes, Anthony Laplap, John Villa, Raymund Sambas, Shani Khandaker, Ryan Christian Quilicot ug Hector Toledano. (BANAT NEWS)
- Latest
