CEBU, Philippines – Gihimadlan ni San Miguel Beermen coach Leo Austria nga ang Barangay Ginebra San Miguel ug Talk ‘N Text Tropang Texters ang makalingkawas sa quarterfinals aron mouban kanila sa Final 4 sa PBA Philippine Cup.
Ang San Miguel uban ang Alaska Aces nagpaabot na lang sa ilang mga ikasangka sa semifinals human sila maoy Top 2 teams paghuman sa elimination round.
Si Austria nagkanayon nga angay na silang magsugod og pangandam sa ilang title defense diin nakita niya nga ang Texters ilang ikaharong sa semis, samtang usa usab ka init nga panagharong ang mahitabo tali unya sa Aces ug Ginebra San Miguel.
Kompiyansa si Austria sa iyang mga panagna bisan pa sa presensiya sa ubang contender sama sa Rain or Shine Elasto Painters, GlobalPort Batang Pier ug Star Hotshots.
Ang quarterfinals sugdan ugmang adlawa diin magsangka ang GlobalPort batok sa Barako Bull Energy sa alas-4 sa hapon, sundan sa duwa tali sa Ginebra ug Star sa alas-7 sa gabii. (BANAT NEWS)