CEBU, Philippines – Masukod na sab ang katakus sa Rain or Shine Elasto Painters dihang ilang ikabagat ang Barangay Ginebra San Miguel sa PBA Philippine Cup karong adlawa didto sa Mall of Asia Arena.
Ang Painters (4-1) ug ang Ginebra (4-3) magtigi sa alas-5 sa hapon human sa duwa tali sa Blackwater Elite ug GlobalPort Batang Pier nga sugdan sa alas-3.
Ang Painters ni coach Yeng Guiao milampos pagpugong sa reigning MVP nga si JuneMar Fajardo sa San Miguel Beermen atol sa ilang kadaugan.
Apan ning higayona, dili lang usa, apan duha ka mga higante ang pugngan sa Painters nga sila si Greg Slaughter ug Japeth Aguilar.
Si Guiao nangandam sa usa ka lisud nga sangka batok sa Ginebra, kinsa bag-o lang midaog batok sa GlobalPort.
Gisaligan sa Ginebra sa ilang mga kadaugan mao sila si Aguilar ug Slaughter rason nga sila ang masentro sa depensa sa Painters.
Tungod niini, gipaandam na ni Guiao iyang mga bigman nga sila si JR Quinahan, Beau Belga, Raymund Almazan ug Jewel Ponferada alang sa usa ka pisikal nga duwa batok sa mga higante sa Ginebra. (BANAT NEWS)