CEBU, Philippines - Si Paulo Inoc maoy labing bulahan sa tanang mga mananaog kay duha ka korona ang iyang
nasakmit sa 2015 MS Motosuit Motocross Series nga giulohan og ‘1st Mayor Paz Radaza Motocross Cup’
niadtong Sabado didto sa Gaisano Island Mall sa Barangay Pajo, Lapu-Lapu City.
Gilupig ni Inoc si Jubenile Abellar aron pagdominar sa expert category diin si Jonjon Adlawan
maoy mipahiluna sa ikatulong puwesto. Gipukan sab ni Inoc si BJ Pepito aron pagsakmit sa korona sa
intermediate class.
Dili hinuon angayan nga maminghoy si Abellar gumikan kay iya mang nawani si Adlawan aron
pagbira sa kampiyonato sa pro open division diin si Inoc nalandig lamang sa ikatulo.
Sila si JP Cuesta, Renren Hisoler, Gelo Leonardo ug JB Lim miani sab og pasidungog. Si Cuesta
maoy nanghawod sa open enduro, si Hisoler sa local enduro, si Leonardo sa beginners open production ug
si Lim sa novice open production.
Doble ang selebrasyon ni Leonardo gumikan kay siya man sab maoy naghari sa mini class 85cc.
Lain pang mga mananaog mao sila si Paul Pierre Marapao sa veterans, Wellie Borces sa
underbone, Badon Kalago sa ladies ug si Famador sa peewee kon mini class 50cc.
Ang mga nanghawod sa executive division mao sila si Ayen Ledesma (A), Paul Pierre Marapao (B)
ug Noli Rim (C).
Gipresenta sa MS Motosuit pinaagi sa tinamod nga businessman/sportsman Lou Ornopia, ang
lumba giorganisar ni Barangay Captain Isabelito Darnayla ug nagmalampuson gumikan sa pagpaluyo sa lokal
nga kagamhanan sa dakbayan sa Lapu-Lapu ubos sa liderato ni Mayor Paz Radaza inabagan ni Kongresista
Aileen Radaza. (BANAT NEWS)