CEBU, Philippines – Miabante sa finals ang Cebu Movers System, Inc. ni Dr. Boy Te ug ang Boss John maoy magtakos alang sa titulo sa Game On "Warriors Cup" human sila mokulit og managlahing kadaogan kagahapon sa crossover semifinals didto sa Cebu Coliseum.
Ang mga batos ni Te milampurnas sa Cebu Bai.com sa iskor, 84-63 samtang unang naangkon sa Boss John ang luna sa finals human ilang gipakuratan ang mas dagko nga Shohuko 5.0 nga gipangulohan nilang Bryan Mendoza, Joseph Jayme ug Ryan Bender sa iskor, 59-57.
Samtang kanunay sikit ang sangka tali sa Boss John ug sa Shohuko diin nag-agi una'g unom ka deadlocks, ang kataposan sa 57-all human sa split charities ni Mendoza may 20 segundos na lang ang nahibiling oras sa duwa.
Apan sa kataposang ball possession sa Boss John, nakapasulod sa iyang jumpdhot si Glenn Padilla alang sa winning shot ug kalit lang maoy nahimong bayani sa duwa.
Si Aldred Du maoy nangu sa Boss John sa iyang 21 puntos ug midugang si Padillo og 15 puntos.
Si Mendoza mibahug og 20 puntos alang sa Shohuko ug miamot og 14 puntos si Jayme.
Sa laing bahin, miposa og game-high 28 puntos si Prime Oporto samtang miburak og 19 puntos si Aries Magdales ug may 11 puntos si Lester Dajao.
Gawas lang sa pipila ka minutos pagsugod sa first quarter, wala gyud makasikit ang Cebu Bai.com nga gipangulohan nilang Roger Tausa ug Leo Ponce kinsa parehong mihakot og 15 puntos samtang miabuno og 10 puntos si Roque Tamayo.
Ang Shohuko ug ang CebuBai.com maoy magsangka alang sa ikatulong pwesto. Ang finals ipahigayon unya pa sa Disyembre 13, adlaw'ng Domingo.
Puntos matag usa:
First Game:
Boss John (59) — Du 21, Padillo 15, Yao 7, Milan 7, Seno 5, Lim 4.
Shohuko 5.0 (57)— Mendoza 20, Jayme 14, Bender 9, Siason 6, Wenceslao 6, Saavedra 4.
Second Game:
Cebu Movers (84) — Oporto 28, Magdales 19, Dajao 11, Seno 8, Mauro 6, Te 4, Doblas 4, Cheng 2, Palima 2.
CebuBai.com (63) —Tausa 15, Ponce 15, Tamayo 10, Canoneo 7, Tarranza 6, Jandog 5, Mandawe 3, Dela Fuente 2. GGM (BANAT NEWS)