CEBU, Philippines - Ang tandem nilang Ryan Noval ug Christian Isabelo maoy migiya sa ikaduhang daog sa Cebu Wetland Resort sa nagkainit nga aksiyon sa Dayon Basketball Club Christmas League 2015.
Nidaog ang Cebu Wetland Resort sa kulbahinam nilang duwa batok sa Trangia Sportswear, 69-61 niadtong Miyerkules didto sa Sacred Heart School old campus gym sa Gen. Maxilom Ave., siyudad sa Sugbo.
Si Noval mirehistro sa iyang career-high 27 puntos aron pangulohan ang Cebu Wetland Resort diin kasagaran sa iyang iskor nagagikan sa mga assist ni Isabelo.
Ang kadaugan magsilbe usab nga regalo ngadto ni Isabelo, kinsa nagsaulog sa ika-30 niya nga adlaw’ng natawhan atol sa maong duwa.
Si Korke Cabahug miiskor sab og double figures sa iyang 12 puntos alang sa Cebu Wetland Resort nga kasamtangang nagbitbit og 2-1 nga baraha. Tulo ka players ang mirehistro og double digits alang sa Trangia Sportswear nga nakatilaw sa ilang ikaduhang pilde sa tulo nila ka duwa.
Sa laing aksiyon, nidaog na gyud ang Imprimis dihang ilang gilat-an ang Boardwalk, 69-39 nga maoy labing lawom nga lubong sa kasamtangan sa maong liga.
Nagbitbit na karon og 1-2 nga baraha ang Imprimis human sa maong kadaugan uban sa Trangia Sportswear ug Bosston, kinsa napilde sab sa Royal Majesty.
Gipakita sa Royal Majesty ang ilang kahawod pinaagi sa paglubong sa Bosston, 81-66 aron magpabiling lider sa maong liga bitbit ang limpiyong baraha, 3-0.
Ang maong torneyo gipasiugdahan ni El Presidente Allan Abella inabagan ni Jepo Abella ug sa tanang miyembro sa Dayon ballclub.
PUNTOS MATAG USA
Unang duwa:
Cebu Wetland Resort (69) – Noval 27, Cabahug 12, Flores 7, Sampang 6, Bakil 6, E. Isabelo 3, C. Isabelo 3, Cardeño 2, Sotto 2, Ybañez 1.
Trangia Sportswear (61) – King 19, Ramesh 12, Panerio 12, Gubaton 6, Bacut 5, Almencion 4, Gonzales 3.
Ikaduhang duwa:
Imprimis (69) – Tan 17 Albores 14, Saguindel 13, Pabarate 6, Padilla 6, Caballero 5, Ano 4, Carin 2, De Dios 2.
Boardwalk (39) – Lim 9, Olendan 8, Lubren 7, Dalde 4, Pedalino 3, Velegamo 2, Luzon 2, Dela Peña 1, Nuñeza 1, Kempogs 1, Elargoza 1.
Ikatulong duwa:
Royal Majesty (81) – Christian 15, Masbate 9, Sanchez 8, Maduro 8, Tumanak 8, Cuyos 7, Estenzo 6, Tablason 6, Canaya 6, Ambrad 4, Magsayo 2, Talaugon 2.
Bosston (66) – Noimo 18, Galo 14, Estrera 10, Ferrer 10, Casicas 4, Alberio 3, Sikil 3, Abella 2, Miñoza 2.