Team Cebu City mopada’g 200 ka atleta sa PNG qualifying

CEBU, Philippines – Ang Team Cebu City (TCC) mopadala og dul-an sa 200 ka mga atleta alang sa Visayas qualifying leg sa Philippine National Games (PNG) nga gikatakda karong Nobiyembre 7 hangtod sa 15 didto sa Evalio B. Javier Memorial Sports Complex sa probinsiya sa Antique.

Labing daghan nga representante nahakot sa TCC gikan sa arnis nga adunay 27 ka mga atleta ug gisundan kini sa athletics  nga adunay gidaghanon nga 26 ka entrante, badminton  nga adunay 19  ug weightlifting ug karatedo nga parehong adunay 18 ka mga entrante.

Ang Muay Thai representahan og 17 ka mga atleta, 16 ka entrante sa swimming, 15 sa boksing ug 12 sa taekwondo.

Ang nahabilin nga miyembro sa delegasyon naapod ngadto sa archery (walo), chess (unom) ug pencak silat (duha).

Sagad nga mga sakop sa TCC mga volunteer teachers ug trainors sa Cebu City Sports Commission (CCSC) gumikan kay kabahin man kini sa rekisito aron sila malakip sa koponan. (BANAT NEWS)