CEBU, Philippines – Milampos ang Batang Gilas sa pagkuha sa una nilang daog sa second round sa 2015 FIBA Asia U16 Championship human nila gipukan ang Iraq, 78-69 niadtong Domingo sa gabii didto sa Indonesia.
Sa maong kadaugan, ang Batang Gilas segurado na og luna sa final eight team quarterfinals showdown.
Ang Batang Gilas lang usab ang usa sa upat ka mga koponan nga wala pa’y pilde sa torneyo uban sa China, Chinese Taipei ug Japan.
Hinuon, dili sayon ang sagubangon sunod sa Batang Gilas tungod kay ikaatubang nila ang lig-ong South Korea sa dili pa ang three-time champion nga China.
Nangulo sa Batang Gilas sa ilang kadaugan batok Iraq si Gian Mamuyac nga mihimo og 16 puntos, samtang si Harvey Pagsanjan miiskor og 13 puntos.
Milabaw og 16 puntos ang Batang Gilas, 60-44, apan nakahimo pagsikit ang Iraq dihang miluag ang depensa sa mga Pinoy sa hinapos nga bahin sa duwa. (BANAT NEWS)