CEBU, Philippines – Miagi pa og lisud nga sangka ang Talk ‘N Text Tropang Texters una nila makuha ang labing una nilang daog human makalihay sa Mahindra Enforcers, 101-97 sa PBA Philippine Cup kagabii sa Mall of Asia Arena.
Ang team ni playing coach Manny Pacquiao miposte’g 76-68 nga bentaha sa third period, apan gihinay-hinay kini’g kitkit sa Texters ug mao na ang milabaw, 97-90 sa katapusang dos minutos sa duwa.
Misuway pa og sikit ang Enforcers, 97-99 sa nahibiling 1:08 sa duwa human sa three-point play ni LA Revilla.
Human sa time-out, nakahimo og mga tira ang Texters, samtang pakyas usab si KG Canaleta sa pag-ilog sa labaw dihang mikagar ang iyang tres sa 25 segundos sa duwa.
Sa maong kadaugan, ang Texters nagbitbit na og 1-1 nga baraha.
Nangulo sa Texters mao si Jayson Castro sa iyang 28 puntos, samtang ang duha ka top rookies nga sila si Troy Rosario ug Moala Tautuaa mihimo og 12 puntos matag usa.
Ang Mahindra gipangulohan ni Revilla sa iyang 21 puntos. (BANAT NEWS)