Nietes mileksiyon ni Alejo mihimo og impresyon sa makasaysayanong Pinoy Pride sa US

CARSON, California — Yano ra kaayong gidominar ni two-division world champion Donnie  ‘Ahas’  Nietes ang Mehikano niining kontra nga si Juan ‘Pinky’ Alejo dayon na ngadto sa pagkulit og impresibong kadaogan pinaagi sa unanimous decision aron pagdepensa sa iyang WBO ug The Ring light flyweight titles sa main event sa makasaysayanong ‘Pinoy Pride 33:Philippines vs the World' fightcard kahapon sa StubHub Center dinhi.

Gikan sa pagsugod sa away, gihimo nang punching bag sa 32-anyos nga si Nietes si Alejo ginamit ang mahait niyang uppercuts inubanan og solidong mga straight ug makabungog nga hooks hinungdan nga mipatigbabaw siya sa scorecards sa tulo ka judges.

Si Lou Moret mi-iskor og 120-108, samtang sila si Pat Russell ug Marshall Walker parehong mitali og 109-109 alang ni Nietes, nga nagbitbit na karon og 37-1-4 record uban ang 21KOs.

Sa dihang gidabo-dabo na niya og kulata si Aleho, mi-angkon si Nietes nga gusto na unta niyang tapuson ang Mehikano ugaling lang kay lig-on ug takos gyud kaayo kining mo-away ug nakalahutay pa gani bisan og gihilam-osan na kini niya sa tanang klase sa suntok.

Mitug-an si Nietes nga nagsugod na sab og sakit ang tuo niyang kamot human siya maka-igo og solidong suntok sa ulo ni Alejo sa ikatulong hugna hinungdan nga pakyas siya sa iyang tinguha nga maka-iskor og knockout. Apan bisan pa man niini, dili malilong ang kabangis sa iyang kadaogan kay wala na mahitsura ang nawong ni Alejo human sa 12 ka hugna nilang bugno.

"Gusto ko din sa early round tapusin ang laban pero matibay din ang kalaban ko kaya pinakita ko na lang ang pinakamagandang laban ko para ang mga manood masiyahan naman," pung pang Nietes atol sa post-fight press conference.

"Matibay lang talaga si Alejo. Magaling mag-counterpunch at saka malakas din ang overhand niya. Gusto ko talaga ma-knockout siya pero medyo nahirapan na rin ako dahil 3rd round pa lamang sumakit na yung kanang kamay ko matapos matamaan ko siya sa ulo," dugang pa sa garbo sa Murcia, Negros Occidental.  "Pero masayang-masaya ako na naipanalo ang laban dahil sa mainit na suporta nga mga Pinoy dito at saka natupad na rin ang pangarap ko na lumaban dito sa US."

Human sa naglagiting niyang kadaogan, si Nietes way kukahadlok nga mitawag sa pangan ni pound-for-pound king Roman "Chocolatito" Gonzalez sa Nicaragua, nga milampos sab pagdepensa sa iyang WBC flyweight belt pinaagi sa pag-TKO ni Fil-Am Brian Viloria sa ikasiyam nga hugna sa susamang adlaw didto sa Madison Square Garden sa New York.

"Gusto ko talagang kakalabanin si  Roman Gonzalez lalo na't nanalo po siya laban kay Viloria. Seguro kami na ang susunod na magkalaban," matud pa ni Nietes.

Si ALA Promotions President ug CEO Michael Aldeguer nagkanayon nga duna nay nahitabong sabot-sabot alang sa maong eksplosibong away tali nilang Nietes ug Gonzalez ug ilang buhaton ang tanan aron kini mahitabo lagmit sa naghinapos nga bahin sa tuig 2016.

"Actually we've started discussing about that. Now that they win their respective fights, we can have serious talks about it already. Nietes wants a bigger fight and Gonzalez is a great champion. That is one big fight we are really looking at in the future," dason pa ni Aldeguer. (BANAT NEWS)