CEBU, Philippines - Wala na’y laing ugma alang sa juniors defending champion Sacred Heart School-Ateneo de Cebu Magis Eagles ug sa University of Cebu Junior Webmasters nga magtiwas sa deciding game sa “best-of-three” championship series sa juniors division sa 15th Cebu Schools Athletic Foundation, Inc. (CESAFI) karong hapon diha sa Cebu Coliseum.
Ang duwa gitakda sa alas-3 sa hapon diin ang Magis Eagles laraw mokubit og ‘back-to-back’ title ug ang Junior Webmasters naglaum nga matambalan na ang ilang kagutom sa korona sud sa pito ka tuig.
Nakapugos og ‘rubbermatch’ ang Magis Eagles human makabawos sa Junior Webmasters sa Game-2, 63-53 aron makatabla sa series, 1-1.
Unang midaog ang Junior Webmasters niadtong Martes, 73-63 nga giisip nga usa sa labing dakung upset karon nga season.
Niadtong Huwebes diin nagkinahanglan lang unta og laing daog ang Junior Webmasters, nasuhong ang ilang mga pambato ug wala kaayo makahuygo silang Froilan Mangubat, Jason Florence Abejo ug Luigi Konrad Gabisan. Wala sab makatabang silang John Bryl Cuyos ug nabaraw sab ang igmat nga gamitoy’ng point guard nga si Gelmart Umpad, ang labing mubo nga high school player karon sa CESAFI nga aduna la’y gitas-on nga 4’5.
Mibalitok na karon ang presyur ngadto sa Junior Webmasters human mobalik ang maayong duwa sa mga pambato sa Magis Eagles nga naglakip nilang Jed Colonia, Errol Pastor ug Wayne Kirby Bersaluna. Andam sab og suporta silang Jelour Travis Mantua, Patrick Yu, Renzo Calumpang, Chris Manaytay ug John Emmanuel Chen.
Sa higayon nga modaog ang Magis Eagles, mao na kini ang ilang ikatulong titulo sa CESAFI.
Sa laing bahin, ugma na sugdan ang “best-of-five” finals series sa collegiate division tali sa University of the Visayas Green Lancers ug University of San Carlos Warriors. (BANAT NEWS)