CEBU, Philippines - Sugod na ang tagakay sa FIBA Asia Championship ug ikasakbang dayon sa Gilas Pilipinas ang delikadong kontra nga Lebanon karong gabii didto sa CSWC Dayun sa Changsha, China.
Ang duwa sugdan sa alas-9:30 sa gabii.
Ang Gilas maoy No. 1 sa group stage hinungdan nga sangkaon nila ang Lebanon, kinsa munasginhawa pag-abante. Ang Lebanon nagkinahanglan pa nga modaog sa ilang ‘do-or-die’ game niadtong Martes batok sa Jordan aron makuha ang No.4 slot paingon sa knockout stage.
Ang kadaugan sa Gilas karon batok sa Lebanon motukmod kanila ngadto sa semifinals diin sangkaon nila ang modaog sa duwa tali sa Japan ug Qatar.
Maisip nga inilog ang Gilas tungod kay gawas nga sila ang No. 1 sa bracket E, wala usab ang sinaligang scorer sa Lebanon nga si Fadi Al-Khatib.
Apan bisan pa niini, si Gilas coach Tab Baldwin mipahinumdum gihapon sa iyang mga batos nga maningkamot og maayo sa ilang duwa batok sa mga Lebanon aron malikayan ang usa ka sakit nga kapildihan.
Ang depensa sa Gilas masentro ngadto sa tulo ka Lebanese cagers nga sila si Amir Saoud, Mohamad Al Haidar ug ang naturalized guard nga si Jay Youngblood.
Si Baldwin nga dugay na nga coach sa FIBA Asia, sinati na sa duwa sa Lebanon nga iyang gihulagway nga usa ka shooting ug running team nga wala magsalig sa height.
Sama sa una nilang mga duwa, ang American coach naglaum nga mopakita gihapon og kalagsik sa depensa ang Gilas ug agresibo nga duwa gikan ni Andray Blatche, Jayson Castro ug Terrence Romeo. (BANAT NEWS)