CEBU, Philippines – Ang duha sa labing init nga bitoon sa Viva Entertainment moanhi dinhi sa Sugbo aron lingawon ang mga fans atol sa gikahinaman nga 15th Cebu Schools Athletic Foundation, Inc. (CESAFI) All-Star Games karong Domingo diha sa Cebu Coliseum.
Si Donalyn Bartolome, nga usa ka YouTube sensation ug ingon man ang batan-ong rapper nga si Shehyee nga popular kaayo sa mga kabatan-onan, mopakita sa ilang talento atubangan sa mga Sugbuanon. Modalit sila og usa ka kanta sa dili pa mag-duet nga seguradong ikalingaw og maayo sa tanang manan-aw.
Sa miaging adlaw, gibutyag ni CESAFI commissioner Felix ‘Boy’ O. Tiukinhoy Jr. ang kompletong listahan sa mga sikat nga basketbolista ning tuiga nga moduwa sa All-Star Games.
Mobanat sa collegiate division ubos sa East team ni coach Gary Cortes mao sila si Steve Cedrick Akomo, Alfred Codilla, June Kent Manzo, Franz Arong, Leonard Santillan, Alvin Aguirre ug Arvie Cabañero sa University of the Visayas Green Lancers, Mark Jayven Tallo, Jesse Bautista, Jovannie Luz, Melvin Holper ug Michael Auditor sa Southwestern University Cobras ug Brantford Borces, Winston Bolivar ug Kino Bajamunde sa University of Southern Philippines Foundation Panthers.
Harungon nila ang West nga gilangkuban nilang Shooster Olago, Charles Pepito, Victor Rabat, Kiefir Lim, Ian Tagapan, Nico Magat ug Ian Ortega sa University of San Carlos Warriors, Ralph Dinolan, Mark Labares ug Kevin Villafranca sa University of San Jose-Recoletos, Joshua de la Cerna, Allan Dimco ug Jose Puerto sa Cebu Institute of Technology-University Wildcats ug Melvin Butohan ug Graciano Puerto sa University of Cebu Webmasters. Mo-coach kanila mao si Britt Reroma.
Sa juniors division, moduwa sa East ni coach Bong Pineda mao sila si Joshua Laurente, Neon Chavez, Jhio Pakanna, Alje Mendez ug Briedyn Smith sa USC, Jhon Kirch Gonzaga, Joshua Ortiz, Arnold Ando ug Jude Teleron sa USJ-R, Jancork Cabahug, Ramish Alforque, Michael Membrano, Beirn Laurente ug Paul Amistoso sa UV ug James Tempra sa Cebu Eastern College Dragons.
Mopakita’g aksiyon sa West ni coach Jover Samonte mao sila si Travis Mantua, Wayne Bersalona, Jed Colonia, Andrew Velasco, Eroll Pastor ug Phil Calumpang sa Sacred Heart School-Ateneo de Cebu Magis Eagles, Froilan Mangubat, Jason Abejo, Luigi Gabisan, John Cuyos ug Gelmart Umpad sa UC, Allen Oberino ug Harvelle Pelig sa USPF ug Jasper Berezo ug Marion Abinuman sa CIT-U. (BANAT NEWS)