CEBU, Philippines - Ang garbo sa mga Sugbuanon nga si Warren Kiamco miabante ngadto sa Final 32 uban ang laing upat ka mga Pinoy’ng bilyarista, kinsa nakalingkawas sab sa ‘knockout stage’ sa 2015 World 9-Ball Championship didto sa Al Arabi Sports Club sa Doha, Qatar.
Dili hinuon tanto ang kalipay ni Kiamco kay ang iyang gipilde mao man ang iyang kababayan nga si Raymund Faraon, 11-9 aron makaangkon og luna sa sunod nga hugna.
Sama sab ang nasinati ni Carlo Biado, kinsa midaog batok ni Lee Van Corteza, 11-5 sa laing all-Pinoy match up.
Nakig-uban nilang Kiamco ug Biado sa sunod nga hugna sa kompetisyon mao sila si Dennis Orcollo, Jeffrey Ignacio ug Oliver Medenilla.
Yano ra kaayong gitagak ni Orcollo ang pambato sa Qatar nga si Mishel Turkey, 11-1, si Ignacio mipilde ni Jason Klatt sa Canada, 11-5, samtang si Medenilla mipukan ni Karol Skowerski sa Poland, 11-4.
Lain pa hinuong duha ka Pinoy ang natagak sab. Kini kay ang laing Sugbuanon nga si Antonio ‘Gaga’ Gabica gikan sa dakbayan sa Lapu-Lapu gibihag ni Ruslan Chinakhov sa Russia, 5-11, samtang si Johann Chua miyukbo ngadto ni Yukio Akagariyama sa Japan, 5-11.
Ang makampiyon sa maong torneyo nga mitanyag og kinatibuk-ang ganti nga $200,000 mobulsa og $30,000, samtang ang runner-up mobitbit og $15,000. (BANAT PALARO)