CEBU, Philippines – Sila si Rinna Babanto ug McAvyngyr Alob, mga Sugbuanong miyembro sa Philippine team, mipakita nga kanunay silang andam dayon na ngadto sa pagsakmit og bulawang medalya sa Smart MVP Best-of-the-Best taekwondo event niadtong Domingo didto sa Robinson’s Place sa Ermita, Manila.
Sila si Babanto ug Alob daku og natabang aron pagtuboy sa De La Salle University (DLSU) ngadto sa kampiyonato sa freestyle team event.
Matud pa ni Babanto nga kalit lang nga giapil ang poomsae kon forms event sa MVP Cup, apan bisan pa man niini nakapakita gihapon sila og maayong labok aron pagpukan sa University of the East. Ang University of the Philippines maoy mipahiluna sa ikatulong dapit.
Ang ilang kadaugan nakapataas sa kompiyansa sa La Salle sa umaabot niining kampanya sa UAAP taekwondo competition karong tuiga.
Sila si Babanto ug Alob parehong mihimo og impresyon sa ilang UAAP debut sa miaging tuig ug nanghinaut sila nga ila kining matupngan o di ba palabwan pa ang ilang performance sa dihang ilang ikasangka ang uban pang tadhan nga varsity jins karong Oktubre 21. (BANAT NEWS)