CEBU, Philippines - Ang Team Yamaha MW-323 maoy nanghawod sa Shell Advance Youth Cup nga gipasiugdahan sa The Racing Line human gipakyaw niini ang kampiyonato sa Mindanao ug Visayas legs.
Si Ephraim Onahon maoy misakmit sa korona sa Mindanao, samtang si Gary Cañeda Jr. mao sab ang mibira sa titulo sa Visayas.
Ang duha ka mga riders misalida og maayo sa Team Yamaha gumikan kay ang upat ka opisyal niining mga miyembro nga sila si Vingie Coloma, Durraine Dan Carlos, Insik Flores ug Axl Teves dili man makalumba sa finals kay gidid-an sila mokabayo og laing brand sa motorsiklo.
“It was indeed a close race between us and the other competing teams for both Visayas and Mindanao. I have to give credit also to all the teams that participated in the series,” matud pa ni team mechanic Raceling Cañeda.
“It was not easy for us to win both Vis-Min crowns,” mubong tubag ni team manager Neil Labrador sa dihang gisukna kun sayon ra ba nga kadaugan ang ilang natagamtaman.
“Our opponents are also tough to beat. As a matter of fact, even I couldn’t tell who will be the champion of champions until it was over. In the end, our Yamaha race bikes and our riders didn’t let us down,” dugang pa ni Labrador.
Dili pa hinuon makaselebrar sa hingpit ang koponan ni Labrador gumikan kay mokumbati pa man sila sa Regional Underbone Grand Prix (RUGP) Finals karong Oktubre 17 diha sa Kartzone racing circuit.
Sila si Onahon ug Cañeda, uban ang laing duha ka riders gikan sa Manila, ipadala sab sa Sepang, Malaysia sunod bulan aron moapil sa try-out alang sa prestihiyosong MOTO3. Mogasto kanila ang Pilipinas Shell, ang event sponsor.
Sa malampuson nilang kampanya, si Labrador mapasalamaton sa mga nagpaluyo kanila nga naglakip sa Yamaha Philippines, MTRT Racing Technology, YSS Super Performance Suspensions, Racing Boy Philippines, Lite Shipping Corporation, NCX Custom Performance Pipes, SSS Sprockets, FDR Tires, KYT Helmets, LS2 Helmets, Final Drive Decals ug Nature’s Spring. (BANAT NEWS)