CEBU, Philippines - Magtiwas karon adlawa ang University of the Visayas Baby Lancers ug ang University of San Jose-Recoletos Baby Jaguars nga magtaktakay alang sa katapusang luna sa semifinals sa juniors division sa 15th Cebu Schools Athletic Foundation, Inc (CESAFI) diha sa Cebu Coliseum.
Ang modaog tali sa Baby Lancers ug sa Baby Jaguars nga sugdan sa ala-1 sa hapon makig-uban sa topseeds Sacred Heart School-Ateneo de Cebu Magis Eagles (8-0), University of San Carlos Baby Warriors (6-2) ug ang University of Cebu Junior Webmasters (5-3) sa semifinal round nga sugdan karong Martes.
Ang Baby Jaguars nagbaton og ‘twice-to-beat’ incentive, apan ang Baby Lancers nga gipangulohan ni Jancork Cabahug nakaangkon og laing kinabuhi human midaog, 68-44 niadtong Septiyembre 10.
Wala na’y ugma alang sa Baby Lancers ug sa Baby Jaguars kay mao na kini ang katapusan nilang higayon aron pagsakmit sa luna sa semis.
Sa collegiate division, ang UV Green Lancers ug ang Southwestern University Cobras nga parehong nagbitbit og 7-2 nga baraha makigsangka batok sa managlahi nilang kaatbang.
Ang UV Green Lancers moharong sa University of Southern Philippines Foundation Panthers sa alas-2:30 sa hapon, samtang ang SWU Cobras makigsangka sa USJ-R Jaguars sa alas-5:30 sa hapon.
Ang University of Cebu Webmasters makigsangka sab sa Cebu Institute of Technology-University Wildcats sa alas-4 sa hapon. (BANAT NEWS)