CEBU, Philippines – Wala kapugngi ang Sacred Heart School-Ateneo de Cebu Magis Eagles sa ilang pagpauwan og puntos sa fourth quarter aron lumsan ang University of San Carlos Baby Warriors, 73-48 ug ingon man magpabiling walay pilde sa juniors division sa 15th Cebu Schools Athletic Foundation, Inc. (CESAFI) kagabii didto sa Cebu Coliseum.
Si Jed Colonia maoy nangu sa Magis Eagles sa iyang 21 puntos, lima ka rebounds, upat ka steals ug duha ka assists aron mahimong best player of the ballgame. Gisundan ni Andrew Velaso, kinsa mitikdol og 16 puntos samtang sila si Errol Pastor ug Patrick Yu miabuno’g 12 ug 11 puntos matag usa.
Sayong gidominar sa Magis Eagles ang duwa aron moiskor og 15 puntos sa halftime, 31-16.
Ang grabeng mga sipyat sa free throws sa Baby Warriors maoy usa sa hinungdan nganong nalubong sila sa Magis Eagles, kinsa hugot kaayong mipatuman sa ilang depensa.
Si Alje de Gracia Mendez mao sab ang nangu sa 4-2 nga Baby Warriors sa iyang 12 puntos.
Ang Baby Warriors mihulga’g makaupat ka higayon, ang katapusang, 40-49 human sa basket ni Jan Joshe Mangaron, apan makabungog ang gibawos sa Magis Eagles ngadto kanila human milusad og 22-2 scoring run aron molabaw og 27 puntos, 71-44 sa nahabiling 2:14 sa duwa.
Sa sayo pa, mihimo’g personal record si Raul ‘Jancork’ Cabahug sa University of the Visayas Baby Lancers human mibahog og 41 puntos uban sa 22 ka rebounds, tulo ka assists ug duha ka steals aron pangulohan ang iyang team ngadto sa 79-74 nga kadaugan batok sa Cebu Eastern College Dragons.
Ang Baby Lancers nagbitbit na karon og 4-3 nga baraha, samtang ang Dragons adunay 1-6 record.
Ang Baby Warriors mihulga’g sikit sa makaupat ka higayon, ang katapusan sa iskor nga 40-49 human sa basket ni Jan Joshe Mangaron, apan makabungog ang gibawos sa Magis Eagles ngadto kanila human mipauwan og 22-2 scoring run aron molabaw og 27 puntos, 71-44 may 2:14 ang nahibiling oras sa duwa. (BANAT NEWS)