CEBU, Philippines – Human sa dul-an sa pito ka tuig, nag-abot pag-usab ang kanhi mortal nga karibal nga sila si Sugar Shane Mosley ug Ricardo Mayorga ibabaw sa ring.
Apan sa ikaduha nilang panagsangka, subling gipatilaw ni Mosley si Mayorga sa iyang kabangis dihang gipaundang niya ang nauwahi sa sixth round gamit ang usa ka body shot.
Pulos na mga gitan-aw nga hapit na moretiro sa boxing, ang duha init nga nagbinayloay og kinumo, apan ang 43-anyos nga si Mosley maoy migawas nga mananaug.
Sa una nilang sangka, si Mosley usab ang midaog kaniadto dihang iyang gi-TKO ang 41-anyos nga si Mayorga sa 12th round.
Si Mosley misaka sa record nga 48-9-1, 40KOs, samtang si Mayorga nakatilaw sa iyang siyam ka pilde sud sa 49 ka away. LPM gikan sa AP