CEBU, Philippines - Maoy puntariya karon sa Sacred Heart School-Ateneo de Cebu Magis Eagles nga mokulit sa ilang ikatulong daog aron magsolo sa liderato sa juniors division diin ilang ikasangka karong hapon ang University of the Visayas Baby Lancers sa 15th season sa Cebu Schools Athletic Foundation, Inc. (CESAFI) diha sa Cebu Coliseum.
Sa bugtong duwa sa collegiate division, suwayan sa University of Cebu Webmasters nga mokulit sa ilang ikaduhang daog dihang ilang sangkaon ang wala’y daog nga Cebu Institute of Technology-University Wildcats.
Ang 2-0 nga Magis Eagles moabante sa unang puwesto sa higayon nga modaog sila karong hapon batok sa 2-1 nga Baby Lancers, kinsa lab-as pa gikan sa ilang kadaugan batok sa Don Bosco Technology Center Junior Greywolves niadtong Huwebes, 76-37.
Magsangka sab karong hapon ang Cebu Institute of Technology-University Wildkittens batok sa UC Junior Webmasters nga parehong nagbitbit og 1-2 win-loss record.