CEBU, Philippines - Upat ka Sugbuanong atleta ang mopakita sa ilang abilidad sa 2nd WTF World Cadet Taekwondo Championships ugmang adlawa didto sa Muju, South Korea Kini naglangkob nilang Dineson Caneda, Windel Rama, Royda Ranile ug Sharmaine Albaracin. Silang tanan milabni og bulawang medalya atol sa Asian Championships.
Mobanat sila sa kyorugi kon sparring event sa maong lima ka adlaw nga torneyo nga gipasiugdahan sa World Taekwondo Federation.
Nagpasabot kini nga sanag ang ugma sa mga Pinoy’ng taekwondo jins dili lamang sa poomsae kon form apan hasta sab sa sparring.
Sa miaging tuig, ang garbo sa Sugbo nga si Mayn Coran midaog og bronze medal sa labing unang edisyon sa maong kompetisyon nga didto nahitabo sa Baku, Azerbaijan.