CEBU, Philippines – Na-itsapwera una sa makadiyot ang ilang panaghigalaay human si reigning Asia-Pacific champ Tim Reed mikulit og sikit nga kadaogan batok sa iyang kababayan nga Australyano ug training partner nga si Tim Van Berkel aron pagsakmit sa men's pro crown sa 2015 Cobra Energy Drink Ironman 70.3 Philippines kagahapon didto sa Shangri-La's Mactan Resort and Spa sa dakbayan sa Lapu-Lapu.
Kulbahinam ug makapaisag balahibo ang ilang kumbati kay si Reed didto na nakabulhot sa katapusang duha ka kilometro sa makutas nga karera aron pag-angkon sa titulo sud sa tulo ka oras, 46 minutos ug tres segundos. Dos segundos lamang ang iyang bintaha sa iyang higala nga si Van Berkel.
Ang 2014 champion nga si Brent McMahon, taga Canada, nanaog ngadto lamang sa ikatulong dapit ning higayona sa oras nga 3:50:23.
Sa women's division, si Caroline Steffen sa Switzerland maoy nanghawod sa ikaupat nga sunod-sunod nga higayon. Gihuman niya ang lumba sud sa oras nga 4:23:54, samtang sila si Beth Gerdes (4:29:07) ug Dimity-Lee Duke (4:29:36) maoy miangkon sa ikaduha ug ikatulo nga puwesto.
Misidlak sab ang mga Pinoy nga triathletes nga gipangulohan sa 'birthday boy' nga si August Benedicto. Bisan pa man og naglain ang tiyan, si Benedicto milampos pagdepensa sa iyang trono sa Filipino male elite category aron pagseguro nga sadya ug kumpleto ang selebrasyon sa ika-31 nga kasumaran sa adlaw niyang natawhan.
Misamot og katam-is ang iyang kalampusan kay naglabaw lamang siya og sayes segundos sa garbo sa mga Sugbuanon nga si John Philip Duenas. Si Benedicto dunay oras nga 4:28:36, samtang si Duenas mitapos sud sa oras nga 4:28:42. Si Banjo Norte maoy na-3rd sa oras nga 4:29:05.
Sa Filipino female elite, si Monica Torres (4:39:37) maoy milangkat sa korona, samtang sila si Maria Hodges (4:53:09) ug LC Langit (5:05:30) maoy mipahiluna sa nagsunod nga duha ka puwesto. (BANAT NEWS)