QUEZON CITY, Philippines – Aduna gyu’y mga bisitang boksidor nga malamba ibabaw sa ring dihang sila si WBO light flyweight champion Donnie ‘Ahas’ Nietes ug Nonito ‘The Filipino Flash’ Donaire Jr. misaad og knockout batok sa ilang mga Latinong kaatbang sa “Pinoy Pride 30: D-Day” karong gabii sa Smart Araneta Coliseum.
Sayod sila si Nietes ug Donaire nga krusyal ug mahinungdanon ang ilang mga away rason nga gusto sila mohimo og impresibong kadaugan.
Si Nietes (34-1, 20KOs), ang Philippine’s longest reigning world champion, makigharong ni Mexican knockout artist Gilberto ‘Parra’ Parrita (19-1 , 17KOs).
“He is a knockout puncher so I expect him to go inside and brawl with me but I studied his style and If I caught him with a good counter then I can say that this will be over,” matud pa ni Nietes, kinsa mitimbang og 108 lbs. sama sa Mexican challenger.
Sa iyang bahin, si Donaire, kinsa mosugod na sa iyang dalan subay sa laing world title, gusto nga mopakita og nindot nga daog aron mapapas sa huna-huna sa iyang mga fans ang sakit niyang kapildihan niadtong Oktubre sa miaging tuig batok ni Nicholas Walters diin nahanaw kaniya ang iyang WBA featherweight title.
Si Donaire (33-2, 21KOs) makigharong ni Brazilian William Prado (22-4-1, 15KOs) alang sa bakanteng NABF super bantamweight crown.
Ang amahan ug trainer ni Donaire nga si Nonito Sr. daku’g pagsalig nga tumbahon sa iyang anak si Prado sa ikaunom nga round.
Sa undercard, si IBF Intercontinental super bantamweight champion ‘Prince’ Albert Pagara (22-0, 15KOs) mangahas sab sa pagtumba ni Mexican veteran Rodolfo ‘Fofo’ Hernandez (26-5, 24KOs).