CEBU, Philippines - Gipilde sa Sugbuanong rider Jaybop Pagnanawon ang mga banggiitang seklista aron modaog sa Stage 1 sa Visayas qualifying leg sa Ronda Pilipinas 2015 nga nagsugod didto sa Dumaguete ug natapos sa Negros Occidental.
Ang taga-Talisay City nga si Pagnanawon mipilde sa mas paborito nga sila si Irish Valenzuela ug Baler Ravina human niya gitaak ang 172.7 kilometrong rota sud sa upat ka oras, 25 minutos ug 11 segundos.
Ang sakop sa Army nga si Valenzuela mioras og 4:25:11, samtang si Ravina adunay oras nga 4:25:12.
Ang 26-anyos nga si Pagnanawon, anak ni Rolando Pagnanawon, ang hari sa Marlboro Tour niadtong tuig 1986.
Ang giisip nga labing dakung cycling race sa Southeast Asia, adunay upat ka stages. (BANAT NEWS)